Daardie Italiaanse brood wat vir my nes ‘n pantoffel lyk, is eenvoudig om te maak. Pleks van spierkrag gebruik jy ‘n elektriese menger – die skoonmaakwerk na die tyd is min.
BESTANDELE
- 500g koekmeel
- 500ml water
- 1 pakkie (10 g) kitsgis
- 10g sout
- Ekstra meel vir sif
METODE
- Verhit jou oond tot 220ºC.
- Gooi al die bestanddele in die bak van ‘n elektriese menger. Gebruik die mengspaan (K-beater) en meng die beslag sowat 10 – 12 minute op volspoed totdat dit ‘n bal vorm in die middel van die menger.
- Los beslag in bak en maak toe met kleefplastiek. Laat rys op ‘n warm plek tot dubbel die volume vir sowat 30 minute.
- Sif ‘n dik laag meel op ‘n bakplaat wat gespuit is met kleefwerende kossproei.
- Keer deeg versigtig op die bakplaat uit. Vorm die deeg met jou vingerpunte in ‘n langwerpige brood.
- Plaas dadelik in die oond en bak vir 20 – 25 minute of tot goudbruin en gaar.
Wenk: Die deeg is baie loperig – jy kan dit nie met jou hande knie nie. [8-10 snye]